04.00 Uhr goht's langsam ond los of Gass,
mer ghört Schrett ond Stemme, d'Strosse send liecht nass.
In chörzi fods denn ändlech ofiziell die rüüdig Zit ah,
de Pols gspört mer im Hals, am erschte Tee esch mer scho dra.
No wenigi Momänt ond denn werd mer ne ghöre of jede Fall,
ech rede natürlech vo euesm gliebte ond rüüdige Urknall.
I allne Gasse ond Strosse fods a schreie, brüehle ond schränze,
die nöchschte Täg dued ganz Lozärn im ne spezielle Strahle glänze.
Mer Möcke startid of em Rothusplatz wie all Johr eusi rüüdige Täg,
aschliessend möchid mer eus met eusem neue Sujet dör Lozärn of de Wäg.
D'Rhythme i de Stadtmuure düend so rechtig zrog halle,
jedem Fasnächtler das is teufschte Ennere dued gfalle.
En anderi Musig i de Gass chrützt ohni stonk euse Wäg,
wenns au i allne Situatione so es locker Meteandnd gäb.
Noch diverse Uftrett denn esch Zit zomene stärchende Zmorge,
scho d'Hälfti esch verbi, vom Rüüdig verreckte Donnschtig Morge.
Bi de CS, bi de Zonft zur Reuss ond of em Möliplatz bi de loschtige Mölch send mer z'gascht,
es esch Zit zonere Pause ond i dere werd wie emmer feini Sache gnascht.
Ponkt vieri stönd denn alli Möcke meh oder weniger grad,
för ne lange Uftrett bim Opus parad.
Noch dem Uftrett hend mer natürlech Zit för eusi Frönde, Gönner ond Bekannte,
för eusi Fans, eusi Fraue ond alli liebe Verwandte.
Im Rütli denn aschliessend heissts ändlech mol öbis Ässe,
jo natürlech, au das dönd mer Möcke a de Fasi ned vergässe.
Im Mönzgässli de zom Fasi-Kino no z'Gascht,
was höt god, eus sälber mängisch öberrascht.
Traditionsgmäss dörfid mer denn noch em Gässle au no bi de Xenon verbi goh,
vom SchmuDo bereits langsam s'legschte Stöndli no schloh.
Noch em ne schöne Abschloss gods denn langsam Hei ist Näscht,
denn morn goht's jo wiiter, euses gliebte, rüüdige Fäscht!
Wiiterhen en schöni Fasnacht 2012 wönschid
Euchi Amok-Symphoniker
