För gwössi heds am Mettag im Al Forno scho weder gstartet,
aschliessend de legschti Fasnachtstag hed of eus gwartet.
Met vollem Buch ond noch em ne feine Ässe,
die erschte Wehmuetsgfühl för de Momänt send vergässe.
Of em Dorfplatz denn i de nöchi vo eusere Bar de Omzog verfolgt,
grad aschliessend am 4i denn au de Möcke-Zog weder rollt.
Scho bald goht's denn in rechtig Stadt ond de as Monschter zom de Schloss ilüüte,
höt dönd mer no einisch rechtig räble ond i d'Enstromänt ine tüüte.
Chli ufwärme ond gniesse binere Mählsoppe, Worscht ond Brot,
so au i de legschte Nacht das Johr keini Hongersnot droht.
Of em Möhliplatz of de Guugerbühni de legscht offiziell Uftrett gmacht,
för eus heissts aber no lang ned "gueti Nacht".
Nomol ab of d'Gass ond die legschte Konzärt so rechtig gniesse,
aschliessend onder d'Träne de Abschloss met Grappa begiesse.
Schön esch es einisch meh gsi, oh Fasnacht eusi grossi Liebi,
die legschte Momänt gnosse, bevor dass mer möchid geknickt denn en Biegi.
D'Zit esch weder vell z'rasch vergange wie leider jedes Johr,
das esch i de Fasnachtssoppe 2012 weder s'einzige gfondne Hoor.
Zom Glöck hend mer no euse Abschloss am Samschtig met em Gönnerfäscht,
doch leider… es esch wohr… das esch denn wörklech no de Räscht.
Im ne Johr gsänd mer eus weder, du rüüdigi Fasnachtszit,
mer hoffid alli, sesch gli ond schnell weder so wiit.
Danke allne Möcke, allne Fans, Frönde ond Gönner,
nöchscht Johr chömid mer weder… glaubids, das wömmer!!!
En gueti Erholig ond bis bald mol weder
Euchi Amok-Symphoniker
